Dieter Baumann
Besuchen Sie uns auf http://www.dieter-baumann.net

DRUCK STARTEN


Weg in de Politik

Ik hebb woll al as Kind wat van mien Opa annohmen. He kunn de hele düütske Geschicht in Riemsels upseggen un de belangriekste Vörfallen daarut heel düdelk verklaren. He vertellde mi ok van de leste düüster Deel ut de Histoorje: de Nationalsozialismus un de 2. Weltkrieg. He weer sülvst as jung Mann freeiwillig mit Füür un Flamm in de 1. Weltkrieg trucken un keem heel vernöchtert weer torügg.
Van de Nazis hull he nix, dee aber ok nix tegen hör. He kunn düdelk maken, wo dat mit de Tosamenhangen, Oorsaken un Utwirkens in de Politik utseeg. As en eenfack Arbeider bi d‘ Waterboo kunn he dat ok in de aktuelle Politik in de Tied na de Krieg utnannerhollen: „Gewerkschaften un Sozialdemokratie sünd för uns Arbeiders belangriek, man se düren neet an de Regierung wesen, denn van Wirtschaft un Geld verstahn se to minn.“
Dat weer de Influss van Opa Bruns ut Rorichum in de 50er un 60 er Jahren.

So bün ik heel neeisgierig up Histoorje, Erdkunn un Politik (Gemeinschaftskunn) worden. Besünners up dat Gymnasium in Emden weren disse Facken för mi de interessantesten.
Een van mien wichtigst Mesters weer Heer Holtermann. He hett uns woll Engelsk lehrt, man meest moralisk, ethisk un charakterbildende Themen mit uns beproot. För annern daar wesen; dien Nahste achten, in Reken hebben un gellen laten; de Swackeren neet stahn laten; neet niedsk wesen up de, de beter, starker, erfolgrieker sünd; Demokratie, Gerechtigheid, Schuul van Minnerheiden: All dat hett mi an de Unnerricht van uns Klassenmester sowat in de 8. bit 10. Klasse gefangen nohmen.

Later, as ik al bi de Junge Union weer, hett mi uns Direktor, Dr. Rother, wieder vöranbrocht. Bi hum harren wi Gemeinschaftskunn in de 12. un 13. Klass. Ofwoll he de SPD anhung, hett he mi in mien Ansichten Mood maakt un kunn mi good lieden.

Dat ik paraat stunn Verantwoorden to overnehmen, wees sük daarin, dat ik Spreker van uns Klass wurr un bi dat Schölerbladdje mitarbeiden dee.
In mien Studium 1968 – 1972 in Münster hebb ik de eerste slimme politisk Utnannersettens mitbeleevt. Dat weren de 68er, de in de Studentenpolitik dat Seggen harren: SDS, SHB, Spartakus, Marxisten/Leninisten, Stamokap.
As en Lidd bi de RCDS (Ring christlicher demokratischer Studenten) höörden wi to de, de utschullen, beduurt un haat wurren. Un doch is uns dat in disse Tied mitlopen, bi en Wahl to dat Studentenparlament mit anner Gruppen, de ok Middelschott harren, de meest Stimmen to kriegen un de ASTA to billen.
Al in de Tied van mien Studium bün ik tohuus de CDU bitreden.
Umdat ik heel flietig bi de Parteiversammelns weer, wurr ik bold Vörstandslidd un kört daarna de 1. Vörsitter van de neei CDU Moormerland.
Na en langerde Paus hebb ik mi 1986 för de Kreisdag Leer, de Gemeenteraad Moormerland un de Ortsraad Warsingsfehn upstellen laten un wurr gliek in all dree Parlamenten wählt. Intüsken bün ik noch fievmaal weerwählt worden.

An Anfang weren dat stuur polistisk Utnannersettens mit de politisk „Tegenspölers“. Man denn hebb ik mi vör all Dingen um de Sörgen un de Nood van mien Mitminsken kümmert. Ik hebb en Sörgentelefon inricht un bün sietdeem de hele Tied mit de Sörgen van de Börgers togang. Dat vergeiht keen Week, mitunner keen Dag, an de nich en Anliggen to bearbeiden is. Ik kann neet immer helpen, faak aver woll. Dat is för mi de grootste Freid un maakt mi stark för de nahst Upgaav.

Dat de EWE 2011 dat Geld, wat för Gas tovööl verlangt worden weer, torügg betahlen muss, weer mien grootste Erfolg. Disse Kampf weer de stuurste un langste, man ok de mit de beste Erfolg in mien Tied as (ehrenamtelk) Kommunaalpolitiker.